Back

ⓘ चम्पदेवी ककनी




                                     

ⓘ चम्पदेवी ककनी

ओखलढुंगा सदरमुकामदेखि करिब १२ कोस पश्चिम र रामेछापको साँघुटारदेखि झन्डै ६ कोस पूर्वमा चम्पादेवी ककनी अवस्थीत छ। यो सुन्दर लेक प्रकृतिको अनुपन देन नै हो। रैथानै शेर्पा र गुरुङ जातिको परम्परागत संंस्कृति, धामीझाँक्री विद्या सिक्ने थलो र हिन्दु धर्मावलम्बीको विश्वासको देवीथानसमेत रहेकाले पर्यटकको आकर्षक गन्तव्य हो, चम्पादेवी ककनी।

भौगोलिक र पर्यटकीय रूपले मात्र सुन्दर नभएर ककनी क्षेत्र वनमा पाइने जडीबुटीका लागि पनि प्रख्यात छ। लोक्ता, अर्गेली, सुनाखरीसँगै चिराइतोलगायतका बहुमूल्य जडीबुटीहरू ककनी क्षेत्रमा पाइन्छन्। दोलखाको बाटो भएर यहाँ पुग्नेहरूले नाम चलेको सुन्दर झरना पोकली हेर्न पाउँछन्। टाढाबाट हेर्दा भीरमा सेतो धागो उनिएजस्तै गरी झरेको पोकली झरनाले यात्रालाई रोमाञ्चक बनाउँछ। भीमेश्वर हुँदै पोकली झरना पुगेर केही अघि बढेपछि पुगिन्छ, चम्पादेवी ककनी।

ककनीबाट देखिने सूर्योदय र सूर्यास्तको मनमोहक क्षण सम्झन लायक हुन्छ। यहाँबाट मकालु, लोप्से, आमादब्लम, गौरीशंकर हिमशृंखलासम्मको अवलोकन गर्न सकिन्छ। मनै लोभ्याउने हरियाली। उकालो, तेर्सो र ओरालीहरूमा भेटिने चौतारीहरू। भेडीगोठका लावालस्कर र गोठालासँग अघिपछि गर्ने झ्याप्ले कुकुरहरूले गर्दा यात्रा रोचक हुन्छ । स्थानीयबासीले व्यवस्थित पारेको होमस्टेले खानेबस्ने चिन्ता भगाउँछ। कोदो र आलुको ढिँडोसँग लोकल कुखुराको मासु खान पाइन्छ। काठमाडौँ उपत्यकाबाट विमान चढेर रुम्जाटार हुँदै एकदिनमा पुग्न सकिन्छ भने सडक भएर रामेछापको मन्थली वा सिन्धुलीको खुर्कोटबाट साँघुटार हुँदै दुई दिन लाग्छ।